តើ 6G គឺជាអ្វី?
បណ្តាញទូរគមនាគមន៍ឥតខ្សែជំនាន់ទីប្រាំមួយ ឬ 6G (Sixth-Generation Wireless) គឺជាអ្នកស្នងតំណែងបន្ទាប់ពីបណ្តាញទូរគមនាគមន៍ឥតខ្សែជំនាន់ទីប្រាំ(5G) ។ បណ្តាញឥតខ្សែមួយនេះ ត្រូវបានគេប៉ាន់ប្រមាណថា នឹងមានសមត្ថភាពខ្ពស់និងលឿនជាងជំនាន់ទី៥ដល់ទៅ១០០ដង និង១០០០ជីហ្គាបៃក្នុងមួយវិនាទី(១០០០Gbps) ។ ទោះជាយ៉ាងណាក៏ដោយ 6G នៅមិនទាន់ជាបច្ចេកវិទ្យាដែលបានដាក់ដំណើរការជាអាជីវកម្មនៅឡើយទេ។ ប៉ុន្តែប្រទេសជាច្រើនកំពុងតែវិនិយោគទៅលើការអភិវឌ្ឍស្តង់ដារបណ្តាញឥតខ្សែជំនាន់ក្រោយនេះ។ គេបានប៉ាន់ប្រមាណថា 6G អាចនឹងត្រូវបានដាក់ប្រើប្រាស់ទូទាំងពិភពលោកនៅឆ្នាំ២០៣០។ ក្នុងនោះផងដែរ 6G ត្រូវបានគេរំពឹងថានឹងជួយសម្រួលក្នុងទីផ្សារឌីជីថលដោយការជួយកែលម្អផ្នែករូបភាពនិងការកំណត់ទីតាំងដោយការប្រើប្រាស់ភ្ជាប់ជាមួយបញ្ញាសិប្បនិម្មិត (AI) រ៉ូបូត និងយាន្ដជំនិះស្វ័យប្រវត្តិបានកាន់តែប្រសើរឡើងថែមទៀតផង។
សារៈប្រយោជន៍ដែលគេរំពឹងទុកអំពីការប្រើប្រាស់6G ៖
- គ្របដណ្តប់ជាសកលរួមទាំងទំនាក់ទំនងយ៉ាងទូលំទូលាយនៅក្រោមទឹក និងសមុទ្រជ្រៅ បណ្តាញអវកាស អាកាស ដី និងសមុទ្រដែលរួមបញ្ចូលគ្នា
- ពង្រីកបណ្តាញអ៊ីនធើណេតទូរស័ព្ទចល័តជាមួយប្រសិទ្ធភាពកាន់តែច្រើន កាត់បន្ថយកំហុសក្នុងការបញ្ជូនសារ
- ការបញ្ចេញកម្រិតកាបូនទាប តាមរយៈការប្រើប្រាស់ឧបករណ៍បច្ចេកវិទ្យាទំនើបដូចជា រថយន្តអគ្គិសនី
- 6Gប្រព័ន្ធឥតខ្សែដែលអាចបម្រើដល់អតិថិជនច្រើនក្នុងពេលតែមួយ
- ពង្រឹងទំហំសន្តិសុខ សុវត្ថិភាពដូចជាតាមដាន និងរកឃើញការលួចចូល ការពិនិត្យតាមដានសុខភាព ការចាប់រូបរាង និងការសម្គាល់មុខមនុស្ស ការពិនិត្យគុណភាពខ្យល់បរិសុទ្ធ ឧស្ម័ន និងខ្យល់ពុលជាដើម
- 6G រួមបញ្ចូលបច្ចេកវិទ្យាផ្សេងៗឱ្យមានទំនាក់ទំនងគ្នាដូចជាavataនៅក្នុងmetaverseជាដើម។
- 6G ផ្តល់ឱ្យនូវការប្រើប្រាស់សេវាអ៊ីនធើណេតមានភាពលឿន និងចំណាយពេលខ្លីជាង5G។
ភាពខុសគ្នារវាង5G និង 6G
5G ឬ ទូរគមនាគមន៍ឥតខ្សែជំនាន់ទី៥ ផ្តល់ល្បឿន ១០ ជីហ្គាបៃក្នុងមួយវិនាទី ដែលលឿនជាង 4G LTE ៣០ដង ប៉ុន្តែនឹងមានល្បឿនយឺតជាង6G ១០០ដង ។ 5G ត្រូវបានគេដាក់ដំណើរការកម្មវិធី យានយន្តស្វ័យប្រវត្តិ IoT និងទីក្រុងឆ្លាតវៃ។ លើសពីនេះ វាក៏ត្រូវបានប្រើដើម្បីផ្តល់សេវាថែទាំសុខភាពពីចម្ងាយ និងធ្វើឱ្យប្រសើរឡើងនូវបទពិសោធន៍លេងហ្គេមយ៉ាងច្រើនផងដែរ។ រីឯ 6G វិញនឹងត្រូវប្រើបម្រុងទុកសម្រាប់គោលបំណងអាជីវកម្មយោធានិងឧស្សាហកម្មជាមួយនឹងការប្រើប្រាស់មួយចំនួនរបស់អតិថិជនដូចជាការកម្សាន្តដ៏សម្បូរបែប។ 6G នឹងអាចបញ្ជូនទិន្នន័យកាន់តែច្រើនក្នុងរយៈពេលតិចជាងមុនដែលធ្វើឱ្យការប្រើប្រាស់កាន់តែមានភាពរលូន។ ម្យ៉ាងវិញទៀតទោះបីជា 6G មានភាពជឿនលឿនជាង 5G ក៏ពិតមែន ប៉ុន្តែការគំរាមកំហែងផ្នែកសន្តិសុខ និងសុវត្ថិភាពដែលបង្កឡើងដោយបណ្តាញ 6G មានហានិភ័យខ្ពស់ជាង 5G ដូចជាការប៉ះពាល់ដល់ឯកជនភាពដោយសារការប្រើប្រាស់បញ្ញាសិប្បនិម្មិតនិងការប៉ះពាល់សុខភាពដោយកម្រិតហ្វ្រេកង់ខ្ពស់និងសារធាតុវិទ្យុសកម្មជាដើម។
6G ទីលានថ្មីនៃការប្រជែងអំណាចប្រទេសចិន និងសហរដ្ឋអាមេរិក
ការប្រណាំងប្រជែងឆ្ពោះទៅរក 6G ធ្វើឱ្យមានចំណាប់អារម្មណ៍ជាច្រើនទៅលើមនុស្សនៅក្នុងបណ្តាញឧស្សាហកម្មបច្ចេកវិទ្យា។ ប្រទេសជាច្រើនកំពុងធ្វើការអភិវឌ្ឍ និងស្រាវជ្រាវឆ្ពោះទៅរកបណ្តាញទូរគមនាគមន៍ឥតខ្សែជំនាន់ក្រោយនេះ ដែលក្នុងនោះដែររួមមានដូចជា សហរដ្ឋអាមេរិក សហភាពអ៊ឺរ៉ុប ចិន កូរ៉េ ជប៉ុន ជាដើម។ ប្រទេសចិន និងអាមេរិកត្រូវបានគេមើលឃើញថាកំពុងមានភាពដឹកនាំខ្លាំងក្នុងការអភិវឌ្ឍទៅរកបច្ចេកវិទ្យា 6G។
ប្រទេសចិនបានចាត់ទុកបច្ចេកវិទ្យាទូរគមនាគមន៍ជាចំណុចកណ្តាលនៃគោលដៅភូមិសាស្ត្រនយោបាយ និងយុទ្ធសាស្ត្ររបស់ខ្លួន។ បើយោងទៅតាមឯកសារយុទ្ធសាស្ត្រផែនការ៥ឆ្នាំ លើកទី ១៤ របស់ចិន 6G គឺជាគោលដៅមួយក្នុងចំណោមអាទិភាពកំពូលរបស់រដ្ឋាភិបាលចិន។ នៅប៉ុន្មានឆ្នាំចុងក្រោយនេះ ចិនទទួលបានជោគជ័យរួចទៅហើយទៅលើ 5G ដោយបានវាយលុកចូលទីផ្សារពិភពលោកបានរហូតដល់ ៧០%នៃស្ថានីយ៍មូលដ្ឋានរបស់ពិភពលោក និង ៨០%ទៅលើឧបករណ៍ភ្ជាប់ 5G ។ កាន់តែពិសេសលើសនេះទៅទៀត ប្រទេសចិនក៏មានបំណងចង់គ្រប់គ្រងលើការអភិវឌ្ឍ និងការដាក់ឱ្យដំណើរការហេដ្ឋារចនាសម្ព័ន្ធ 6G ដូចអ្វីដែលខ្លួនបានធ្វើនៅក្នុង 5G ផងដែរ ដោយធ្វើឱ្យមានស្តង់ដារនៅឆ្នាំ២០២៥ និងដាក់ដំណើរការពាណិជ្ជកម្មនៅឆ្នាំ២០៣០។ ប្រតិបត្តិករទូរគមនាគមន៍ធំៗចំនួនបីរបស់ប្រទេសចិនគឺ China Mobile, China Telecom និង China Unicom សុទ្ធតែចូលរួមនៅក្នុងការស្រាវជ្រាវ និងការអភិវឌ្ឍន៍ 6G។ ក្រសួងឧស្សាហកម្ម និងបច្ចេកវិទ្យាព័ត៌មានរបស់ប្រទេសចិនកំពុងវិនិយោគ និងត្រួតពិនិត្យ 6G ដោយក្រុមស្រាវជ្រាវ និងអភិវឌ្ឍន៍(R&D) នៅក្នុងប្រទេស។ ក្រៅពីនេះរដ្ឋាភិបាលចិនបាននឹងកំពុងប្រើប្រាស់ ធនធាន បរិក្ខារឥណទាន ពន្ធរបស់រដ្ឋ និងទម្រង់ជំនួយរបស់រដ្ឋដែលពាក់ព័ន្ធ ដើម្បីបង្កើនសមត្ថភាពផលិតឧបករណ៍ក្នុងស្រុក ស្វែងរកទីផ្សារដល់ក្រុមចិនដើម្បីឆ្ពោះទៅដល់ 6G ដំបូងគេ និងឈានមុខគេផងដែរ។ ម្យ៉ាងទៀត ប្រទេសចិនក៏កំពុងវិនិយោគយ៉ាងខ្លាំងផងដែរទៅលើបច្ចេកវិទ្យាដែលជាឆ្អឹងខ្នងសំខាន់នៃហេដ្ឋារចនាសម្ព័ន្ធ 6G ដូចជាបន្ទះសៀគ្វីចាស់ និងបញ្ញាសិប្បនិម្មិត(AI) ដើម្បីកាត់បន្ថយការពឹងផ្អែកទំនិញពីបរទេស។ ក្នុងពេលជាមួយគ្នានេះដែរ ប្រទេសចិនកំពុងបង្កើនការចូលរួមរបស់ខ្លួននៅក្នុងវេទិកាអន្តរជាតិដើម្បីទទួលបានឥទ្ធិពលលើដំណើរការកំណត់ស្តង់ដារ 6G និងធ្វើឱ្យក្រុមហ៊ុនទូរគមនាគមន៍ចិនក្លាយជាអ្នកផ្តល់សេវា6Gដែលពេញនិយមនៅជុំវិញពិភពលោក។ លើសពីការទទួលបានអត្ថប្រយោជន៍សេដ្ឋកិច្ចតាមរយៈ 6G ប្រទេសចិនក៏មានគោលបំណងនាំមុខក្នុងការប្រើប្រាស់បច្ចេកវិទ្យាយោធាផងដែរ។ នៅក្នុងខែមករា ឆ្នាំ ២០២២ អ្នកស្រាវជ្រាវចិនបានរាយការណ៍ថា ឧបករណ៍ឡាស៊ែរ 6G បានបង្កើតឡើងដែលអាចចាប់យន្តហោះបំបាំងកាយក្នុងលំហល្បឿនលឿន និងមីស៊ីលដែលមានល្បឿនលឿនជាងសំឡេង ។ ប្រទេសចិនក៏អាចប្រើប្រាស់ 6G ដើម្បីបង្កើនសមត្ថភាពឃ្លាំមើល ការឆ្លបយកការណ៍ បង្កើនការបណ្តុះបណ្តាលយោធាបានផងដែរ។ ដូចនេះចិនអាចប្រើប្រាស់សមត្ថភាព 6G របស់ខ្លួន ដើម្បីទទួលបានអត្ថប្រយោជន៍ផ្នែកយោធាដ៏សំខាន់ ប្រសិនបើជម្លោះជាមួយសហរដ្ឋអាមេរិកកើតឡើង។
យ៉ាងណាមិញ អាមេរិកក៏កំពុងនឹងអភិវឌ្ឍន៍ទៅលើ6Gផងដែរ។ រដ្ឋាភិបាលអាមេរិក និងសម្ព័ន្ធមិត្តរបស់ខ្លួនបានចេញសេចក្តីថ្លែងការណ៍រួមមួយស្តីពីការអនុម័តគោលការណ៍ 6G ក្រោមឈ្មោះសន្តិសុខជាតិ(National Security) ក្នុងគោលបំណងស្រាវជ្រាវ និងអភិវឌ្ឍន៍ជាងមុន និងស្តង់ដារទៅលើ6G។ អ្នកសេដ្ឋកិច្ចវិទូបានមើលឃើញថាទង្វើនេះជាការប្រកាសប្រកួតប្រជែងក្នុងវិស័យបច្ចេកវិទ្យារបស់អាមេរិក ក្រោយពីមានការវាយលុកយ៉ាងទូលំទូលាយនៃ5Gរបស់ប្រទេសចិន។ ក្នុងអំឡុងពេលកិច្ចប្រជុំថ្នាក់រដ្ឋមន្ត្រីលើកទីបួននៃក្រុមប្រឹក្សាពាណិជ្ជកម្ម និងបច្ចេកវិទ្យា (TTC) ដែលធ្វើឡើងនៅទីក្រុងលូលៀ (Luleå) ប្រទេសស៊ុយអែត នៅថ្ងៃទី ៣១ ខែឧសភា ឆ្នាំ ២០២៣ រដ្ឋបាលសហភាពអឺរ៉ុប និងសហរដ្ឋអាមេរិកបានអះអាងសារជាថ្មីនូវការប្តេជ្ញាចិត្តរបស់ពួកគេក្នុងកិច្ចសហប្រតិបត្តិការដើម្បីអភិវឌ្ឍន៍6G ។ រដ្ឋាភិបាលសហរដ្ឋអាមេរិកបានចាត់វិធានការយ៉ាងសកម្មរួចហើយ ដើម្បីធានាថាប្រទេសនេះនៅតែនាំមុខគេនៃបច្ចេកវិទ្យា។ នៅខែសីហា ឆ្នាំ ២០២២ មូលនិធិវិទ្យាសាស្ត្រជាតិ (NSF) បានប្រកាសការវិនិយោគ ១០០ លានដុល្លារត្រូវបានដាក់នៅក្នុងការស្រាវជ្រាវ និងការអភិវឌ្ឍន៍ 6G ។ ការផ្តល់មូលនិធិនេះនឹងគាំទ្រដល់គំនិតផ្តួចផ្តើមផ្សេងៗ រួមទាំងការធ្វើតេស្តសាកល្បង ការសហការជាមួយដៃគូឧស្សាហកម្មផ្សេងៗ និងការអភិវឌ្ឍផ្សេងៗទៀត។ លើសពីនេះ ក្រុមហ៊ុនទូរគមនាគមន៍ធំៗនៅសហរដ្ឋអាមេរិកបានចូលរួមយ៉ាងសកម្មក្នុងការអភិវឌ្ឍន៍បច្ចេកវិទ្យា 6G ។ ពួកគេកំពុងវិនិយោគយ៉ាងច្រើនក្នុងការស្រាវជ្រាវ និងសហការជាមួយស្ថាប័នសិក្សា សាកលវិទ្យាល័យ។ ការវិនិយោគទាំងនេះនឹងមិនត្រឹមតែជំរុញកំណើនសេដ្ឋកិច្ចប៉ុណ្ណោះទេ ប៉ុន្តែថែមទាំងដាក់ទីតាំងសហរដ្ឋអាមេរិកជាប្រទេសនាំមុខគេក្នុងឧស្សាហកម្មទូរគមនាគមន៍ផងដែរ។
ប្រសិនបើប្រព័ន្ធបច្ចេកវិទ្យាឥតខ្សែ6Gត្រូវបានដឹកនាំម្តងទៀតដោយប្រទេសចិន វាអាចនឹងផ្តល់ជាផលវិបាកជាច្រើនដល់សហរដ្ឋអាមេរិក។ ភាពពេញនិយមរបស់បច្ចេកវិទ្យាចិនយ៉ាងទូលំទូលាយជាសកលអាចបង្ខំឱ្យសហរដ្ឋអាមេរិកគិតគូរឡើងវិញ។ 6G របស់ចិនអាចមានផលប៉ះពាល់ដល់សន្តិសុខជាតិ និងការពារជាតិរបស់សហរដ្ឋអាមេរិកផងដែរ។
