Nokia Corporation គឺជាក្រុមហ៊ុនទូរគមនាមន៍ (multinational telecommunications, information technology, and consumer electronics company) ដ៏ល្បីល្បាញមួយរបស់ប្រទេសហ្វាំងឡង់ និងត្រូវបានគេស្គាល់ថាជាប្រ៊ែនទូរស័ព្ទល្បីជាងគេជុំវិញពិភពលោកនៅអំឡុងឆ្នាំ២០០០។ ជោគជ័យរបស់ក្រុមហ៊ុន Nokia នៅចុងទសវត្សរ៍ឆ្នាំ១៩៩០ និងដើមទសវត្សរ៍ឆ្នាំ២០០០ គឺជាយុគសម័យដែលក្រុមហ៊ុននេះ បានក្លាយជាក្រុមហ៊ុនផលិតទូរស័ព្ទចល័តឈានមុខគេនៅលើពិភពលោក។ ការិយាល័យកណ្តាលក្រុមហ៊ុន Nokia មានទីតាំងនៅទីក្រុង Espoo នៃប្រទេសហ្វាំងឡង់។ យោងទៅតាម macrotrends ក្រុមហ៊ុន Nokia មានទ្រព្យសម្បត្តិសរុប ២៥,៦១ ប៊ីលានដុល្លាអាមេរិក នៅឆ្នាំ២០១៩។ ឧបករណ៍ទាំងអស់របស់ Nokia ត្រូវបានផលិតនៅគ្រប់ទិសទី ដោយរោងចក្រផលិត Nokia មាននៅប្រទេសជាច្រើនដូចជា ហុងកុង ម៊ិកស៊ិក ចិន ប្រេស៊ីល និងអាឡឺម៉ង់ជាដើម រួចចែកចាយពាសពេញពិភពលោក។
មុននឹងក្រុមហ៊ុន Nokia ឈានដល់យុគសម័យរុងរឿងដែលជាក្រុមហ៊ុនទូរស័ព្ទយក្សនៅទូទាំងពិភពលោក Nokia គ្រាន់តែជាក្រុមហ៊ុនបើកអាជីវកម្មផលិតក្រដាសប៉ុណ្ណោះ កាលពីជាង១៥០ឆ្នាំមុន។ ដើមឡើយ លោក Fredrik Idestam បានបង្កើតរោងចក្រក្រដាស ដោយកាប់ឈើផ្តាច់មុខនៅប្រទេសហ្វាំងឡង់ ដើម្បីយកមកផលិតក្រដាស។ នាពេលនោះ អាជីវកម្មនោះដំណើរការយ៉ាងជោគជ័យ ទើបលោក Fredrik សម្រេចចិត្តបង្កើតសាខាទី២ ជាអាជីវកម្មផលិតក្រដាសដដែល ស្ថិតនៅទីក្រុងមួយឈ្មោះ Nokia ក្បែរទទ្លេ Nokianvirta នែប្រទេសហ្វាំងឡង់។ បន្ទាប់ពីលោក Fredrik ចូលនិវត្តន៍ កាលពីឆ្នាំ១៩០២ លោក Mckellen ដែលជាដៃគូអាជីវកម្មរបស់លោក Fredrik បានប្រើប្រាស់ទីតាំងទន្លេ Nokianvirta នោះ ដើម្បីពង្រីកក្រុមហ៊ុន Nokia ដើម្បីឈានចូលទៅធ្វើអាជីវកម្មថាមពលអគ្គិសនី។ យ៉ាងណាមិញ អាជីវកម្មផលិតក្រដាសបានខាតទុនជាដំណំនៅអំឡុងសង្រ្គាមលោកលើកទី១ ប៉ុន្តែប្រាក់ចំណូលរបស់អាជីវកម្មថាមពលអគ្គិសនីបានជួយស្រោចស្រង់ក្រុមហ៊ុន Nokia ឲ្យរួចផុតពីគ្រោះនោះ ដោយសារតែនៅពេលនោះ ថាមពលអគ្គិសនីជាតម្រូវការចំបាច់របស់អ្នកប្រើប្រាស់។
បន្ទាប់ពីសង្គ្រាមលោកលើកទី១ នៅឆ្នាំ១៩១៨ ក្រុមហ៊ុន Nokia បានជួបនូវបញ្ហាខាងហិរញ្ញវត្ថុយ៉ាងខ្លាំងម្តងទៀត រហូតដល់ ក្រុមហ៊ុន Finnish Rubber Work និងបន្ទាប់មកក្រុមហ៊ុន Finnish Cable works បានទិញភាគហ៊ុនពីក្រុមហ៊ុន Nokia។ គិតត្រឹមឆ្នាំ១៩៣២ អាជីវកម្មសំខាន់ៗរបស់ Nokia Group រួមមាន អាជីវកម្មផលិតក្រដាស កៅស៊ូ និងខ្សែកាប (Cable)។
ក្រោយពេលបញ្ចប់សង្គ្រាមលោកលើកទី២ សហភាពសូវៀតត្រូវរៀបចំវិស័យហេដ្ឋារចនាសម័្ពន្ធឡើងវិញ ដោយបានទិញសម្ភារផ្តាច់មុខពីក្រុមហ៊ុន Nokia។ បន្ទាប់ពីបានប្រាក់កម្រៃពីការលក់សម្ភារទៅកាន់សហភាពសូវៀតយ៉ាងច្រើន បានធ្វើឲ្យក្រុមហ៊ុន Nokia ពង្រឹងផ្នែកហិរញ្ញវត្ថុកាន់តែរឹងមាំ និងនាំឲ្យពួកគេឆ្ពោះទៅរកការអភិវឌ្ឍបច្ចេកវិទ្យាទំនើប។ នៅឆ្នាំ១៩៧៧ លោក Kari Kairamo ជា CEO ក្រុមហ៊ុន Nokia បានដឹកនាំក្រុមហ៊ុនឲ្យឆ្ពោះទៅកាន់ការផលិតអេឡិចត្រូនិកជាពិសេសគឺទូរទស្សន៍។ មកដល់ជំនាន់ការគ្រប់គ្រងរបស់លោក Jorma Ollila ក្រុមហ៊ុនបានងាកមកប្រឹងប្រែងផលិតទូរស័ព្ទជាអាជីវកម្មចម្បងវិញ។
ពួកគេបានចាប់ផ្តើមដាក់លក់ទូរស័ព្ទជាលើកដំបូងរបស់ខ្លួនមានឈ្មោះថា Nordic Moblie Telephon (NMT) នៅឆ្នាំ១៩៨១។ មួយឆ្នាំកន្លងមក ពួកគេបានបើកដំណើរការលក់ទូរស័ព្ទចល័តដំបូងឈ្មោះ Mobira Senator និង Nokia DX200 ដែលជាទូរស័ព្ទចល័តបែបឌីជីថល។ ក្រោយមក ដោយសារតែទូរស័ព្ទចល័តរបស់ ក្រុមហ៊ុន Nokia នៅជំនាន់ដំបូងៗមានលក្ខណៈធំ និងទម្ងន់ធ្ងន់ ពិបាកក្នុងការផ្លាស់ទី ទើបពួកគេបានចេញទូរស័ព្ទចល័តឈ្មោះ Mobira Cityman នៅលើទីផ្សារកាលពីឆ្នាំ១៩៨៧។ Mobira Cityman ជាទូរស័ព្ទចល័តដែលមានរូបរាងតូចជាងមុន ងាយផ្លាស់ទី និងអាចកាន់ដោយដៃម្ខាងតែប៉ុណ្ណោះ ប៉ុន្តែបើយោងតាមគេហទំព័រ Microsoft ទូរស័ព្ទនេះមានតម្លៃថ្លៃរហូតដល់ €៤.៥០០ បើធៀបនឹងតម្លៃរូបិយប័ណ្ណ និងស្មើ €៤.៩៩៥ អឺរ៉ូ បើធៀបនឹងបច្ចុប្បន្នស្មើ €៤.៩៩៥ អឺរ៉ូ។ នៅឆ្នាំ ១៩៩១ លោក Harri Holkeri ដែលជានាយករដ្ឋមន្រ្តីហ្វាំងឡង់ បានចេញគោលនយោបាយដែលហៅថា បណ្តាញ GSM (Global System for Mobile Communications) ដើម្បីបង្កើតស្តង់ដារបច្ចេកវិទ្យាទូរស័ព្ទចល័ត។ បច្ចេកវិទ្យា GSM មានតួនាទីយ៉ាងសំខាន់ជាច្រើនរួមមានអាចហៅចេញទាំងនៅក្នុងប្រទេសឬក្រៅប្រទេសជាសំឡេងដែលមានគុណភាពច្បាស់ជាងមុន និងគាំទ្រសេវាកម្មថ្មីៗដូចជាការផ្ញើសារ (SMS) បានបង្កើតមូលដ្ឋានគ្រឹះសម្រាប់ការប្រើប្រាស់ទូរស័ព្ទចល័តងាយស្រួលជាងមុន ហើយគោលនយោបាយនេះត្រូវបានបង្កើតឡើងដោយក្រុមហ៊ុន Telenokia and Siemens ដែលជាផ្នែកមួយរបស់ក្រុមហ៊ុន Nokia។ បន្ទាប់មក ក្រុមហ៊ុន Nokia បានប្តូរឈ្មោះមក Nokia Siemens Network វិញ។
យោងតាមការចេញផ្សាយរបស់ The Wall Street Journal នៅអំឡុងទសវត្សរ៍ឆ្នាំ១៩៩០ ការដួលរលំរបស់សហភាពសូវៀត ដែលត្រូវជាដៃគូពាណិជ្ជកម្មដ៏សំខាន់របស់ក្រុមហ៊ុន Nokia បាននាំឲ្យក្រុមហ៊ុននេះជួបប្រទះបញ្ហាផ្នែកហិរញ្ញវត្ថុយ៉ាងធ្ងន់ធ្ងរ។ បន្ទាប់ពីការជួបបញ្ហាដូចខាងលើ ក្រុមហ៊ុន Finnish Rubber Work បានសម្រចចិត្តផ្តាច់ចេញពីក្រុមហ៊ុន Nokia ហើយអាជីវកម្មផ្សេងៗរបស់ក្រុមហ៊ុន Nokia ត្រូវបានលក់ជាបន្តបន្ទាប់ទៅឱ្យក្រុមហ៊ុនដ៏ទៃ ដោយនៅសល់តែអាជីវកម្មផលិតទូរស័ព្ទមួយប៉ុណ្ណោះ។ បន្ទាប់មកនៅឆ្នាំ១៩៩៤ Nokia បានចេញលក់ទូរស័ព្ទស៊េរី ២១០០ ស៊េរីដំបូងគេដែលមានសម្លេងរោទ៍របស់ Nokia និងហ្គេមពស់ ហើយ Nokia បានកំណត់គោលដៅថានឹងលក់បាន ៤០០.០០០ គ្រឿងនៅទូទាំងពិភពលោក ប៉ុន្តែ ពួកគេបានលក់រហូតដល់ ២០ លាន គ្រឿងឯណោះ។ នៅឆ្នាំ១៩៩៨ ក្រុមហ៊ុន Nokia ចាប់ផ្តើមមានឈ្មោះនាំមុខគេក្នុងទីផ្សារទូរស័ព្ទចល័តនៅលើពិភពលោក។ រួចបន្តមកឆ្នាំ២០០៤ ក្រុមហ៊ុននេះនៅតែបន្តនាំមុខគេខាងផ្នែកទូរស័ព្ទចល័តដដែល ដោយមានភាគហ៊ុនជាង ៣៥% នៃទីផ្សារទូរស័ព្ទចល័តរបស់ពិភពលោក។ យោងតាមគេហទំព័ររបស់ telegraph ទូរស័ព្ទរបស់ Nokia ម៉ូឌែល Nokia 1100 និង 1110 ស្ថិតនៅក្នុងចំណាត់ថ្នាក់លេខ ១ និងលេខ ២ ដោយលក់បានជាង ២៥៥ លានគ្រឿងជាប់ឈ្មោះជាទូរស័ព្ទដែលលក់ដាច់បំផុតក្នុងប្រវត្តិសាស្ត្រនៃឆ្នាំ២០១៧។ #ថង់ប្រាជ្ញា #Nokia
អ្នកអាចចូល subscribe Telegram ផ្លូវការរបស់ The SEED តាមរយៈ https://t.me/TheSEED
អត្ថបទចែករំលែកដោយ៖ កញ្ញា លីម កន្និដ្ឋា
គំនូរច្នៃប្រឌិតដោយ៖ កញ្ញា ហេង លីពណ្ណរាយ
