"ថង់ប្រាជ្ញារបស់កម្ពុជា ដឹកនាំដោយគ្រាប់ពូជរបស់កម្ពុជា"

តើកត្ដាអ្វីខ្លះធ្វើឱ្យក្រុមហ៊ុន Amazon មានផ្លែផ្កាដូចសព្វថ្ងៃ?

គំនូរច្នៃប្រឌិតដោយ៖ កញ្ញា ហេង លីពណ្ណរាយ

នៅក្នុងសតវត្សទី២១នេះ ការទិញទំនិញអនឡាញបានទទួលប្រជាប្រិយភាពពីសកលលោកយ៉ាងខ្លាំង ដោយសារតែភាពងាយស្រួលនិងឆាប់រហ័សនៃប្រព័ន្ធអ៊ីនធឺណិត។ បើយោងតាមស្ថិតិរបស់ Statista​ សព្វថ្ងៃនេះ ក្រុមហ៊ុន Amazon គឺជាក្រុមហ៊ុនដែលធំជាងគេបង្អស់លើពិភពលោកក្នុង​ការជួញដូរទំនិញអនឡាញ ។ ក្រុមហ៊ុននេះក៏ជាក្រុមហ៊ុនមួយក្នុងចំណោមក្រុមហ៊ុនបច្ចេកវិទ្យាធំៗមួយចំនួនទៀតដែលកំពុងត្រួតត្រាទីផ្សារពាណិជ្ជកម្មអេឡិកត្រូនិកនិងជាក្រុមហ៊ុនលេខបួនដែលមានមូលធនទីផ្សារតម្លៃថ្លៃជាងគេក្នុងតម្លៃ ១,៧៦៨.៩៥ប៊ីលានដុល្លាសហរដ្ឋអាមេរិកនៅក្នុងឆ្នាំ២០២១នេះ។ ម៉្យាងវិញទៀត ពិភពលោកកំពុងកត់សម្គាល់ទៅលើភាពកើនឡើងឥតឈប់ឈររបស់ក្រុមហ៊ុន Amazon នៅក្នុងមូលដ្ឋានអ៊ីនធឺណិតដោយកំណត់ពីការកើនឡើងដំបូងក្នុងប្រាក់ចំណូលចំនួន១៥លានដុល្លារសហរដ្ឋអាមេរិកក្នុងឆ្នាំ១៩៩៤ រហូត ២២.៣៣ប៊ីលានដុល្លារសហរដ្ឋអាមេរិកក្នុងឆ្នាំ២០២០ ដែលជាអត្រានៃការកើនឡើងយ៉ាងឆាប់រហ័សបំផុត។

Amazon មុននឹងឈានមកដល់ភាពជោគជ័យ

មុននឹងយើងឈានទៅមើលលើចំណុចជោគជ័យ យើងក៏ត្រូវងាកមកមើលនូវប្រវត្តិនិងមូលហេតុក្រោយការទាញយកនូវទីផ្សារពាណិជ្ជកម្មអេឡិកត្រូនិកនៃក្រុមហ៊ុន Amazon ផងដែរ។ ក្រុមហ៊ុន Amazon ត្រូវបានរកឃើញនៅក្នុងឆ្នាំ ១៩៩៤ ដោយលោក ជែហ្វ បេហ្សូស Jeff Bezos។ លោកបានបង្កើតក្រុមហ៊ុននេះដំបូងក្នុងគោលបំណងជាក្រុមហ៊ុនលក់សៀវភៅតាមប្រព័ន្ធអ៊ីនធឺណិតតែប៉ុណ្ណោះ ប៉ុន្តែអាជីវកម្មនេះត្រូវបានដំណើរការយ៉ាងលឿនដោយសារតែការលក់សៀវភៅ ដែលអ្នកជាវអាចស្វែងរកបានដោយគ្មានដែនកំណត់នៅក្នុងប្រព័ន្ធអ៊ីនធឺណិត។ ក្នុងឆ្នាំ ១៩៩៤ នោះផងដែរ Amazon.com បានលក់ចេញសៀវភៅទៅកាន់រដ្ឋទាំង៥០ក្នុងសហរដ្ឋអាមេរិក និងប្រទេសចំនួន៤៥ទៀតនៅជុំវិញពិភពលោកក្នុងអំឡុងពេលត្រឹមតែ២ខែដំបូងនេះបើយោងតាមការចេញផ្សាយរបស់ Ecommerce Nation (ECN)។ ដោយអាជីវកម្មទទួលបានភាពជោគជ័យមួយផ្នែកតូច លោក Jeff Bezos បានចាប់ផ្តើម Initial Public Offering ក្នុងឆ្នាំ១៩៩៧ ដើម្បីពង្រីកទីផ្សារក្រុមហ៊ុនរបស់ខ្លួនដោយដាក់ក្រុមហ៊ុន Amazon ក្នុងការជួញដូរស្តុកក្នុងតម្លៃ១៨ដុល្លារសហរដ្ឋអាមេរិកក្នុងមួយហ៊ុន។ ប៉ុន្តែតម្លៃហ៊ុននេះត្រូវបានធ្លាក់ចុះមកត្រឹម១០ដុល្លារសហរដ្ឋអាមេរិកក្នុងមួយហ៊ុនដោយសារតែព្រឹត្តិការណ៍មួយហៅថា The Dotcom Bubble នៅទសវត្សន៏ឆ្នាំ១៩៩០នោះ។

តើអ្វីជា The Dotcom Bubble?

បើយោងតាមការចេញផ្សាយរបស់ Investopedia The Dotcom Bubble គឺជាព្រឹត្តិការណ៏ដែលបានជំរុញឱ្យមានការធ្វើវិនិយោគក្នុងមូលដ្ឋានអ៊ីនធឺណិត និងបានធ្វើឱ្យអ្នកវិនិយោគជាច្រើនក្ស័យធននៅពេលដែលការវិនិយោគទាំងនោះមិនបានផ្តល់នូវប្រាក់ចំណូល ឬបង្កើតនូវផែនការអាជីវកម្មអ្វីឡើយ។ ក្រុមហ៊ុន Amazon ត្រូវបានរួចផុតពីព្រឹត្តិការណ៍មួយនេះដោយសារតែមានការជួយទប់ទល់ពីប្រាក់ចំណូលដែលពួកគេទទួលបាននៅក្នុងអំឡុងពេលដែលអាជីវកម្មដែលខ្លួនបានបើកដំណើរការដំបូង។ ទោះបីក្រុមហ៊ុន Amazon បានរួចផុតពីព្រឹត្តិការណ៏នោះក៏ពិតមែន ក្រុមហ៊ុននេះមិនទាន់ទទួលនូវប្រាក់ចំណេញនោះទេរហូតដល់ចុងឆ្នាំ២០០១ ព្រោះដោយសារលោក Jeff Bezos បានបង្កើតផែនការអាជីវកម្មរបស់ក្រុមហ៊ុន Amazon ដោយផ្តោតសំខាន់ទៅលើការធ្វើឱ្យម៉ាកផលិតផលរបស់ពួកគេមានការទទួលស្គាល់ និងមិនសូវមានការផ្តោតសំខាន់ទៅលើប្រាក់ចំណូលនៅឡើយ។ ជាមួយគ្នានេះ លោក Jeff Bezos ក៏បានធ្វើការពង្រីកអាជីវកម្មរបស់លោកក្នុងគ្រប់វិស័យបន្តិចម្តងៗ រហូតដល់សព្វថ្ងៃនេះដែលក្រុមហ៊ុន Amazon បានទទួលប្រាក់ចំណូលជាច្រើន និងលក់ស្តុកក្នុងតម្លៃ១,៩០០ទៅ៣,២០០ដុល្លារសហរដ្ឋអាមេរិកក្នុងមួយហ៊ុន បើយោងតាមការចេញផ្សាយរបស់ Forbes។

កត្តាជំរុញភាពជោគជ័យរបស់ Amazon

១ ការបង្កើនអាជីវកម្មគ្រប់ប្រភេទក្នុងទីផ្សារពិភពលោក

ក្រុមហ៊ុន Amazon សព្វថ្ងៃ មិនត្រឹមតែលក់សៀវភៅនោះទេ តែក៏មានការលក់សម្ភារៈគ្រប់ប្រភេទដែលអតិថជនអាចរកឃើញនៅក្នុងគេហទំព័ររបស់ Amazon ដូចជាសម្ភារៈអេឡិកត្រូនិក គ្រឿងសង្ហាររឹម គ្រឿងសម្អាង និងសម្ភារៈជាច្រើនទៀត។ ម៉្យាងវិញទៀត លោក Jeff Bezos បានទទួលភាពជោគជ័យក្នុងការពង្រីកក្រុមហ៊ុនរបស់ខ្លួនទៅក្នុងថ្នាក់អន្តរជាតិមិនត្រឹមតែមកពីការលក់សម្ភារៈគ្រប់ប្រភេទនោះទេ តែក៏មកពីការពង្រីកទីផ្សាររបស់ក្រុមហ៊ុននេះទៅជាអាជីវកម្មច្រើនវិស័យផ្សេងៗទៀត ដូចជាសេវាកម្មនិងឧបករណ៏ទស្សនាវីដេអូ(Prime Video និងRoku Express) សេវាកម្មអនឡាញ ឧបករណ៏បច្ចេកវិទ្យាច្នៃប្រឌិត(Alexa/Echo និងKindle)និងសេវាកម្មលក់គ្រឿងទេសដែលទើបនឹងបង្កើតថ្មីៗនេះ។ យោងតាមការចេញផ្សាយសារពត៌មានរបស់ BBC ដោយសេវាកម្មក្នុងគ្រប់វិស័យនេះ បានធ្វើឱ្យក្រុមហ៊ុន Amazon អាចប្រកួតប្រជែងដោយផ្ទាល់ជាមួយនឹងក្រុមហ៊ុនបច្ចេកវិទ្យាធំៗដ៏ទៃទៀតដូចជា Facebook Apple Google និងNetflixជាដើម។

២ គំនិតច្នៃប្រឌិត និងប្រជាប្រិយភាព

ក្រុមហ៊ុន Amazon មានអតិថិជនឆ្លងកាត់គេហទំព័ររបស់ខ្លួនចំនួនលើសពី ៣០៤លាននាក់ជារៀងរាល់ថ្ងៃ ដូចនេះការគ្រប់គ្រងសេវាកម្មទៅដល់អតិថិជនតែងតែជាចំណុចសំខាន់បំផុត។ យោងតាមការស្ទង់មតិនៃទស្សនៈអតិថិជននៃការចេញផ្សាយរបស់ Sellics ភាពជោគជ័យមួយផ្នែករបស់ក្រុមហ៊ុន Amazon គឺផ្អែកទៅលើចំណុច៣របស់ក្រុមហ៊ុនដែលធ្វើឱ្យបទពិសោធន៏របស់អតិថិជនក្នុងការទិញសម្ភារៈអនឡាញមានភាពល្អប្រសើរ នោះគឺ ការជួញដូរសម្ភារៈគ្មានដែនកំណត់ តម្លៃសមរម្យ និងភាពឆាប់រហ័សក្នុងសេវាកម្មដឹកជញ្ចូន។ ប៉ុន្តែ កត្តាធំដែលធ្វើឱ្យក្រុមហ៊ុននេះរីកចម្រើននោះគឺ យន្តការ Amazon Flywheel។ យន្តការនេះផ្តោតសំខាន់ទៅលើបទពិសោធន៍របស់អតិថិជនក្នុងការទិញទំនិញអនឡាញដែលជំរុញឱ្យមានចរាចរណ៍ក្នុងការដាក់ផលិតផលពីអ្នកលក់ដែលជាជនទីបីមកកាន់គេហទំព័រ Amazon។ វាបានបង្កើតនូវភាពប្រសើរឡើងក្នុងអត្រានៃប្រភេទ និងចំនួនផលិតផលគ្រប់មុខក្នុងគេហទំព័ររបស់ Amazon ដែលធ្វើឱ្យចំនួនអតិថិជនកាន់តែកើនឡើងមកកាន់ក្រុមហ៊ុន។  មិនត្រឹមតែប៉ុណ្ណោះ ក្រុមហ៊ុន Amazon ក៏ទទួលបានភាពរីកចម្រើន និងប្រាក់ចំណូលធំៗពីការបង្កើតបច្ចេកវិទ្យាច្នៃប្រឌិតរបស់ខ្លួនផងដែរ។ ឧទាហរណ៏ ការផលិតនូវឧបករណ៏បញ្ចាសម្លេង(Echo)របស់ក្រុមហ៊ុន Amazon ត្រូវបានលក់ចេញចំនួន ២២លានឧបករណ៏ក្នុងឆ្នាំ២០១៧តែម្នាក់ឯង និងការប្រើប្រាស់ម៉ាស៊ីនមនុស្សយន្តដើម្បីធ្វើការជំនួសពលកម្មរបស់មនុស្ស ដែលធ្វើឱ្យមានការភាពល្អប្រសើរក្នុងការបម្រើសេវាកម្មរបស់អតិថិជន។

ភាពជោគជ័យរបស់ Amazon នៅអំឡុងកូវីដ១៩

បើយើងងាកមកមើលក្រុមហ៊ុន Amazon ក្នុងអំឡុងពេលនៃការរាតត្បាតរបស់ជំងឺកូវីដ១៩វិញ ក្រុមហ៊ុននេះក៏មិនបានទទួលនូវផលប៉ះពាល់អ្វីឡើយ ផ្ទុយមកវិញក្រុមហ៊ុន Amazon បានទទួលការកើនឡើងនៃប្រាក់ចំណេញជិត ២០០% ដោយសារតែការបិទខ្ទប់នៃហាងខាងក្រៅនិងបង្កើតឱកាសសម្រាប់ហាងអនឡាញក្នុងការជួញដូរ។ ម៉្យាងវិញទៀត ក្រុមហ៊ុន Amazon មិនត្រឹមតែមានការកើនឡើងក្នុងប្រាក់ចំណូលនោះទេ តែក៏ធ្វើឱ្យក្រុមហ៊ុននេះពង្រីកហេដ្ឋារចនាសម្ព័ន្ធចំនួន ៥០ ភាគរយនៅឆ្នាំ ២០២០ និងបន្ថែមបុគ្គលិកជាង ២៥០,០០០ នាក់ដែលមានចំនួនសរុប ១លាននាក់ បើយោងតាមការចេញផ្សាយរបស់ Research FDI។

អ្នកអាចចូល subscribe Telegram ផ្លូវការរបស់ The SEED តាមរយៈ TheSEED
អត្ថបទដោយ៖ លោក ឡេង ហ៊ត
spot_img
spot_img

អត្ថបទពេញនិយម

អត្ថបទទាក់ទង