"ថង់ប្រាជ្ញារបស់កម្ពុជា ដឹកនាំដោយគ្រាប់ពូជរបស់កម្ពុជា"

គោលនយោបាយមុននិងក្រោយ លោកនាយករដ្ឋមន្ត្រីជប៉ុន យូស្ហីស៊ីដេ ស៊ូហ្កាឡើងកាន់ដំណែង

គំនូរច្នៃប្រឌិតដោយ៖ កញ្ញា បូរ ដាលីន

ប្រទេសជប៉ុនអាចចាត់ទុកថាជាប្រទេសដែលមានរបត់នយោបាយប្លែកគួរឱ្យកត់សម្គាល់ដោយសារតែផ្លាស់ប្ដូរនាយករដ្ឋមន្ត្រីយ៉ាងញឹកញាប់។ បើគិតចាប់ពីឆ្នាំ២០០០ រហូតមកដល់ឆ្នាំ ២០២១នេះ ប្រទេសជប៉ុនបានផ្លាស់ប្ដូរនាយករដ្ឋមន្ត្រីអស់១១លើក ខណៈដែលសហរដ្ឋអាមេរិកផ្លាស់ប្ដូរប្រធានាធិបតីត្រឹមតែ ៥ លើកប៉ុណ្ណោះក្នុងអំឡុងពេល ២ ទសវត្សរ៍ដដែលនេះ។ ហេតុដូចនេះ វាគ្មានអ្វីគួរឱ្យភ្ញាក់ផ្អើលទេ នៅពេលដែលកាន់អំណាចមិនទាន់បាន ១ ឆ្នាំស្រួលបួលផង ស្រាប់តែលោកនាយករដ្ឋមន្ត្រីយូស្ហីស៊ីដេ ស៊ូហ្កា (Yoshihide Suga) ប្រកាសថាលោកនឹងមិនឈរឈ្មោះជាបេក្ខជនបោះឆ្នោតប្រធានគណបក្សដែលនឹងត្រូវធ្វើឡើងនៅទី២៩ ខែកញ្ញានេះ។ ការប្រកាសបែបនេះគឺស្មើនឹងបោះបង់ឱកាសជានាយករដ្ឋមន្ត្រីអាណិត្ដថ្មី ពីព្រោះតែគណបក្ស Democratic Party (LDP) មានប្រូបាបច្រើនដើម្បីឈ្នះការបោះឆ្នោតនាយករដ្ឋមន្ត្រីដោយសារតែគណបក្ស LDP មានកាន់សម្លេងភាគច្រើននៅក្នុងសភា។ ដូចនេះតើហេតុអ្វីបានជាលោកនាយករដ្ឋមន្ត្រីយូស្ហីស៊ីដេ ស៊ូហ្កា បោះបង់ឱកាសធ្វើជានាយករដ្ឋមន្ត្រីអាណត្ដិក្រោយ? ហើយតើកិច្ចការអ្វីខ្លះដែលនាយករដ្ឋមន្ត្រីយូស្ហីស៊ីដេ ស៊ូហ្កាត្រូវដោះស្រាយមុនពេលកាន់តំណែង និងអំឡុងពេលកាន់តំណែង?

កិច្ចការដែលលោក នាយករដ្ឋមន្ត្រីយូស្ហីស៊ីដេ ស៊ូហ្កាត្រូវដោះស្រាយមុនពេលកាន់តំណែង៖

ដើម្បីយល់ឱ្យស៊ីជម្រៅអំពីកិច្ចការមុនពេលលោកនាយករដ្ឋមន្ត្រីយូស្ហីស៊ីដេ ស៊ូហ្កា កាន់តំណែង យើងគួរស្វែងយល់បន្តិចអំពីស្ថានការណ៍ប្រទេសជប៉ុនកាលពីឆ្នាំ២០២០សិន។ រដ្ឋការដែលបានកាន់អំណាចយូរជាងគេនៅក្នុងប្រវត្តិសាស្រ្ដជប៉ុនមានអាយុកាលចំនួនជាង ២៨០០ ថ្ងៃ ត្រូវបានបញ្ចប់នៅពេលលោក ស្ហីនហ្សូ អាបេ (Shinzō Abe) បានសម្រេចលាលែងពីតំណែងជាលើកទី២ដោយសារតែជំងឺប្រចាំកាយ។ នៅថ្ងៃទី១៦ ខែកញ្ញា ឆ្នាំ២០២០ លោក យូស្ហីស៊ីដេ ស៊ូហ្កា (Yoshihide Suga) ត្រូវបានជ្រើសរើសជានាយករដ្ឋមន្ដ្រីថ្មីដើម្បីជំនួសមិត្តរួមបក្សរបស់លោក។ នាយករដ្ឋមន្ត្រីទី៩៩ រូបនេះបានឡើងកាន់អំណាចចំពេលដែលពិភពលោកកំពុងតែហែលឆ្លងវិបត្តិកូវីដ១៩ និងត្រូវដោះស្រាយបញ្ហាដែលសល់ពីរដ្ឋការរបស់លោក អាបេ។ កាលនោះ ក្រៅពីកូវីដ១៩ បញ្ហាធំៗចំនួនពីរដែលនាយករដ្ឋមន្ត្រីថ្មីត្រូវយកចិត្តទុកដាក់នោះគឺបញ្ហាសេដ្ឋកិច្ចនិងការទូត។

ក្នុងបញ្ហាសេដ្ឋកិច្ចរបស់ជប៉ុន ដែលជាទូទៅប្រទេសនៅក្នុងពិភពលោកតែងតែយកចិត្ដទុកដាក់លើអតិផរណាដែលប្រាក់ចំណូលរបស់ប្រជាជនទាបជាងប្រាក់ដែលត្រូវចំណាយ ក៏ប៉ុន្តែប្រទេសជប៉ុនបែរជាឈឺក្បាលជាមួយបរិត្តផរណាទៅវិញដោយហេតុតែទំនិញធ្លាក់ថ្លៃខ្លាំងពេក។ លោកសូហ្គា ទទួលថ្មបាក់មួយទៀតគឺបញ្ហាបំណុលសាធារណៈដែលបានកើនដូចភ្នំចាប់តាំងពីឆ្នាំ១៩៩០។ យោងតាមរបាយការណ៍របស់ធនាគារនៃជប៉ុន (Bank of Japan) បំណុលសាធារណៈជប៉ុនបានកើនឡើងដល់ ១២,២ ទ្រ៊ីលានដុល្លារអាមេរិក ដែលស្មើនឹង ២៤០% នៃ ផលិតផលក្នុងស្រុកសរុប (GDP)។ ជាមួយគ្នានេះដែរ កាលពីដើមឆ្នាំ ២០២០ រដ្ឋការរបស់លោក អាបេ ក៏បានបន្ថែមបំណុលចំនួន ២ ទ្រីលានដុល្លារអាមេរិក ដើម្បីជួយសេដ្ឋកិច្ចជប៉ុនដើម្បីហែលឆ្លងវិបត្ដិកូវីដ ១៩។

ចំណែកឯការទូតវិញ ជប៉ុនត្រូវបានបន្តដើរគោលនយោបាយការបរទេសលើការពង្រឹងភាពជិតស្និទ្ធជាមួយប្រទេសសម្ព័ន្ធមិត្ដ។ ប្រទេសសម្ព័ន្ធមិត្តធំៗរបស់ជប៉ុនមួយចំនួនដូចជា អាមេរិក កូរ៉េខាងត្បូងជាដើម បានមានភាពល្អក់កករកាលពីរដ្ឋការរបស់លោក អាបេ។ ទំនាក់ទំនងរវាងជប៉ុននឹងអាមេរិកវិញគឺមានភាពល្វីងបន្តិចអំឡុងរដ្ឋកាលលោកអតីតប្រធានាធិបតី ដូណាល់ ត្រាំដោយសារប្រទេសអាមេរិកហាក់បានយកការតម្លើងពន្ធនាំចូលរថយន្ដជប៉ុនជាចំណាប់ខ្មាំង ដើម្បីឱ្យជប៉ុនយល់ព្រមលើកិច្ចព្រមព្រៀងពាណិជ្ជកម្មដែលទម្លាក់ពន្ធនាំចូលផលិតផលកសិកម្មរបស់អាមេរិក។

កិច្ចការដែលរុញឱ្យលោកនាយករដ្ឋមន្ត្រីមិនឈរឈ្មោះអាណត្ដិក្រោយ

មានការស្ទង់មតិជាច្រើនបានបង្ហាញថាប្រជាប្រិយភាពរបស់លោក យូស្ហីស៊ីដេ ស៊ូហ្កា ត្រូវបានធ្លាក់ចុះយ៉ាងគំហុក ហើយបើផ្អែកការស្រាវជ្រាវរបស់ Mainichi Shimbun និង The Social Survey Research Center អត្រានៃការគាំទ្រធ្លាក់ដល់ ៦៦%។ ការធ្លាក់ប្រជាប្រិយភាពរបស់លោក យូស្ហីស៊ីដេ ស៊ូហ្កាគឺដោយសារកត្តាធំៗចំនួន ២ ដែលមានដូចជាការមិនអាចដោះស្រាយវិបត្ដិកូវីដ១៩ និងការធ្វើម្ចាស់ផ្ទះការប្រកួតកីឡាអូឡាំពិក។ ប្រទេសជប៉ុនជួបប្រទះការវាយលុកដោយរលកកូវីដ១៩ជាច្រើនលើក ហើយថ្មីៗនេះគឺត្រូវបានគម្រាមកំហែងដោយមេរោគបម្លែងថ្មី។ យ៉ាងណាមិញ អំឡុងរដ្ឋការរបស់លោក យូស្ហីស៊ីដេ ស៊ូហ្កា ជាងមួយឆ្នាំនេះ ស្ថានភាពកូវីដ១៩ របស់ជប៉ុននៅសភាពមិនសូវធូរស្រាលដែលចំនួនអ្នកស្លាប់បានហក់ឡើងជាង ១៦០០០ ករណី ខណៈករណីឆ្លងថ្មីកើនឡើងរហូតល្បាក់ ១.៦ លាននាក់ ហើយបាននិងកំពុងបន្តហែលឆ្លងរលកកូវីដ១៩លើកទី ៥។ ក្រឡេកទៅមើលការចាក់វ៉ាក់សាំងវិញក៏នៅមានល្បឿនទាប ហើយបើផ្អែកលើរបាយការណ៍របស់អង្គការ OurWorldInData ជប៉ុនបានចាក់វ៉ាក់សាំងពេញលេញឱ្យប្រជាជនរបស់ខ្លួនត្រឹមតែ ៤៩.៦២% តែប៉ុណ្ណោះ។ អ្នកជំនាញមើលឃើញថាការ ប្រណាំងរវាងការចាក់វ៉ាក់សាំងនិងឆ្លងកូវីដ១៩ប្រភេទឌែលតាគឺនៅមានគម្លាតគ្នា ដែលការឆ្លងមេរោគកូវីដ១៩កំពុងនាំមុខការចាក់វ៉ាក់សាំង។ ប្រទេសជប៉ុនត្រូវបានបិទខ្ទប់តាំងពីខែឧសភា ហើយនៅសប្ដាហ៍នេះ លោក យូស្ហីស៊ីដេ ស៊ូហ្កា បានប្រកាសថានឹងពន្យារការបិទខ្ទប់ម្ដងទៀត ដោយសារតែប្រព័ន្ធសុខាភិបាលនៅមានកម្រិតមិនទាន់ស្រាកស្រាន្ដ ដែលនេះបណ្ដាលមកពីករណីចម្លងថ្មីចេះតែកើតមាន ហើយមន្ទីពេទ្យនៅកកកុញនៅឡើយ។

រាជរដ្ឋាភិបាលរបស់លោក យូស្ហីស៊ីដេ ស៊ូហ្កា ក៏បានជំនះប្រារព្ធការប្រកួតកីឡាអូឡាំពិក បើទោះជាមានករណីកូវីដ១៩កំពុងវាយលុកខ្លាំងពីមេរោគកូវីដ១៩បម្លែងថ្មី និងមានការជំទាស់របស់ប្រជាពលរដ្ឋជប៉ុនជាដើម។ យោងតាមការស្រង់មតិចេញផ្សាយដោយ The New York Times កាលពីខែឧសភាប្រជាពលរដ្ឋជប៉ុនជាង ៨០% មិនគាំទ្រឱ្យការប្រារព្ធកម្មវីធីប្រកួតអូឡាំពិកឡើយ។ មិនត្រឹមតែប៉ុណ្ណោះ ក្រុមគ្រូពេទ្យក៏បានស្នើសុំរដ្ឋាភិបាលឱ្យលុបចោលការប្រកួតនេះដែរ។ ចាប់តាំងពីការបើកការប្រកួតនិងកំពុងប្រកួត ប្រជាពលរដ្ឋជប៉ុនជាច្រើនចេញមកធ្វើបាតុកម្ម និងស្រែកថា “បញ្ឈប់កូវីដ១៩” ហើយសម្រែករបស់បាតុករក៏អាចលឺចូលស្តាតដែលកំពុងមានការប្រកួតដែរដោយសារការប្រកួតធ្វើឡើងដោយស្ថប់ស្ថាត់និងគ្មានអ្នកចូលទស្សនាការប្រកួតនោះទេ។

គោលនយោបាយការបរទេសយ៉ាងល្អរបស់លោក យូស្ហីស៊ីដេ ស៊ូហ្កា

ត្បិតតែប្រជាប្រិយភាពរបស់លោកយូស្ហីស៊ីដេ ស៊ូហ្កា មិនសូវទទួលបានផ្លែផ្កានៅក្នុងការដោះស្រាយវិបត្ដិនៅក្នុងប្រទេសក្ដី ក៏ប៉ុន្តែនយោបាយការបរទេសអំឡុងការកាន់អំណាចរបស់លោកមានភាពរលូនល្អប្រសើរជាងលោក ស្ហីនហ្សូ អាបេ។ នយោបាយការបរទេសរបស់លោក យូស្ហីស៊ីដេ ស៊ូហ្កា ហាក់មិនសូវមានភាពល្អក់កករឡើយជាមួយប្រទេសជាសម្ព័ន្ធមិត្ដដូចជាកូរ៉េខាងត្បូង និងប្រទេសអាមេរិក។ ទំនាក់ទំនងរវាងសហរដ្ឋអាមេរិកនិងជប៉ុនមានភាពល្អូកល្អិនជាងមុន ដែលជាក់ស្ដែងអាមេរិកនិងជប៉ុនបានប្រកាសជាសម្លេងរួមមួយថា “ពួកយើងនឹងប្ដេជ្ញាចិត្ដធ្វើការជាមួយគ្នាដើម្បីដោះស្រាយបញ្ហាចិន និងបញ្ហាជាច្រើនទៀតដូចជាសមុទ្រចិនខាងកើត សមុទ្រចិនខាងត្បូង ក៏ដូចជាកូរ៉េខាងជើង ដើម្បីធានាឱ្យមានភាបសេរី និងបើកចំហនៅក្នុងឥណ្ឌូបា៉ស៊ីភិកនាថ្ងៃអនាគត”។ ក្នុងនោះដែរ ជប៉ុនរដ្ឋការរបស់លោក យូស្ហីស៊ីដេ ស៊ូហ្កា ក្នុងនាមជាប្រទេសសម្ព័ន្ធមិត្ដរបស់អាមេរិក ជប៉ុនក៏បានដើរនយោបាយការបរទេសនៅក្នុងភូមិសាស្ត្រនយោបាយដ៏ល្អដោយមានទំនាក់ទំនងល្អជាមួយតៃវ៉ាន់ ដែលនេះបានជួយចំណែកកាត់បន្ថយឥទ្ធិពលរបស់ចិនទីក្រុងប៉េកាំងទៅលើតៃវ៉ាន់ផងដែរតាមរយៈការផ្ដល់ជំនួយវ៉ាក់សាំងជាដើម ខណៈតៃវ៉ាន់បានចោទប្រកាន់ចិនថាជាអ្នករារាំងមិនឱ្យតៃវ៉ាន់ទទួលវ៉ាក់សាំង Pifer។

កិច្ចការដែលនឹងត្រូវបន្សល់នៅនាយករដ្ឋមន្រ្តីថ្មី

ជាការពិតណាស់ កិច្ចការដែលនាយករដ្ឋមន្ត្រីថ្មីត្រូវដោះស្រាយដំបូងគេគឺដោះស្រាយវិបត្ដិកូវីដ១៩។ នាយករដ្ឋមន្ត្រីថ្មីក៏ត្រូវទទួលថ្មបាក់ថ្មបាក់សេដ្ឋកិច្ចមួយចំនួនដែរដូចជាបំណុលសាធារណៈ អត្រាបរិត្តផរណា ជាដើម។ ក្រឡេកមើលនយោបាយការបរទេសវិញ ត្បិតតែក្រឡានយោបាយការបរទេសរបស់លោក យូស្ហីស៊ីដេ ស៊ូហ្កា ត្រូវបានប្រទេសអាមេរិករីករាយនិងសាទរមែន ក៏ប៉ុន្តែក៏អាចនឹងបង្កើតផលវិបាកមួយចំនួនដែរ ក្នុងនោះចិនអាចឆ្លើយតបនិងទប់ទល់ជប៉ុនវិញដែលអាចខូចប្រយោជន៍សេដ្ឋកិច្ចរបស់ជប៉ុន។ បញ្ហាទឹកដីរវាងជប៉ុននិងរូស្សីលើកោះចំនួន ៤ នៅ Hokkaido ក៏នឹងត្រូវផ្ទេរទៅឱ្យនាយករដ្ឋមន្ត្រីថ្មីផងដែរ។ ម្យ៉ាងវិញទៀត ត្បិតតែភាពរកាំរកុះរវាងជប៉ុននិងកូរ៉េខាងត្បូងមានសភាពស្ងប់ស្ងាត់ក្នុងរដ្ឋការរបស់លោកយូស្ហីស៊ីដេ ស៊ូហ្កា ក៏ពិតមែន ប៉ុន្តែភាពស្ងប់ស្ងាត់នេះមិនអាចមានជានិរន្តរ៍នោះទេ ដោយសារគំនិតខុសគ្នាលើវិធានការទទួលខុសត្រូវនូវកំហុសដែលជប៉ុនបានសាងកាលពីសម័យសង្គ្រាម និងជាពិសេសប្រទេសទាំងពីរនេះនៅយល់ឃើញខុសគ្នាលើសន្ធិសញ្ញាឆ្នាំ១៩៦៥នៅតែបន្តហើយជាពិសេសនោះថាតើនាយករដ្ឋមន្រ្តីថ្មីនឹងទៅគោរពវិញ្ញាណក្ខន្ធឥស្សរជននៅវិហារយ៉ាស៊ូគូនីរបស់ថ្នាក់ដឹកនាំជប៉ុនដែរឬទេ?

ចួលរួម 1$ ដើម្បីគាំទ្រអ្នកសរសេរអត្ថបទ និង វិចិត្រករ
អត្ថបទដោយ៖ លោក ហ៊ុយ បញ្ញាវ័ន្ដ
spot_img
spot_img

អត្ថបទពេញនិយម

អត្ថបទទាក់ទង