តើអ្វីជាគ្រាប់រ៉ុកកែតល្បឿនលឿនជាងសម្លេង (Hypersonic Missiles)?

រាប់ចាប់ពីការសង្គ្រាមលោកទាំង ២ លើក និងសង្គ្រាមត្រជាក់មក ពិភពលោកបាននិងកំពុងបន្តស្រាវជ្រាវបច្ចេកវិទ្យាថ្មីៗដើម្បីបំពេញនូវភាពងាយស្រួលរបស់មនុស្ស និងមហិឆ្ឆតារបស់ខ្លួនក្នុងការដើរបច្ចេកវិទ្យឱ្យបានលឿនជាងប្រទេសដទៃ។ ក្នុងន័យនេះ បច្ចេកវិទ្យាបានបង្កើតឡើងដើម្បីជួយជីវិតមនុស្សឱ្យកាន់តែប្រសើរឡើង និងដើម្បីពង្រឹងនិងពង្រីកវិសាលភាពនៃវិស័យយោធាផងដែរ។ ជាក់ស្ដែង នាប៉ុន្មានសប្ដាហ៍កន្លងទៅនេះ ប្រទេសចិនដែលជាប្រទេសមហាអំណាចសេដ្ឋកិច្ច និងជាគូរប្រជែងរបស់សហរដ្ឋអាមេរិកបានសាកល្បងយុទ្ធោបករណ៍ដ៏ទំនើបមួយហៅថា Hypersonic Missile។ ការសាកល្បង មីស៊ីលដ៏ទំនើបមួយនេះចំពេលដែលប្រទេសចិនកំពុងតែមានភាពតានតឹងខ្លាំងជាមួយតៃវ៉ាន់ និងការប្រកួតប្រជែងភូមិសាស្ត្រនយោបាយជាមួយសហរដ្ឋអាមេរិក។

អ្វីជា Hypersonic Missile? ហើយវាខ្លាំងប៉ុណ្ណា?

Hypersonic Missile គឺជាគ្រាប់រ៉ុកកែតល្បឿនលឿនដែលអាចធ្វើដំណើរក្នុងល្បឿងលឿនជាងសម្លេងរហូតដល់ទៅ៥ដងឬច្រើនជាងនេះ ហើយវាមានសមត្ថភាពក្នុងការផ្ទុកនូវក្បាលគ្រាប់នុយក្លេអ៊ែរដូចជាគ្រាប់ម៊ីស៊ីលធម្មតាដែរ (Ballistic Missiles) តែវាខុសប្លែកនិងទំនើបជាងត្រង់ថា Ballistic Missiles ត្រូវការហោះឡើងឱ្យខ្ពស់ដល់លើអាកាសហើយទើបទម្លាក់ខ្លួនមកគោលដៅ រីឯ Hypersonic Missile អាចហោះកោងនៅលើអាកាសត្រង់រយៈកម្ពស់និងមុំកំណោងទាបដែលអាចឱ្យវាវាយប្រហារគោលដៅបានឆាប់រហ័សជាងម៊ីស៊ីលធម្មតា។ ជាមួយសមត្ថភាពនេះទៀតសោត ភ្នាក់ងារសន្តិសុខយោធាសហរដ្ឋអាមេរិកក៏លំបាកបន្តិចដែរ ព្រោះថា បច្ចេកវិទ្យានៃប្រព័ន្ធចាប់មីស៊ីលសព្វថ្ងៃនេះអាចទប់ស្កាត់បានតែ Ballistic Missiles និងគ្រាប់ផ្លោងដែលបាញ់ចេញពីកប៉ាល់តែប៉ុណ្ណោះ។ មិនត្រឹមតែប៉ុណ្ណោះ ទំហំផ្ទុកក្បាលគ្រាប់របស់ម៊ីស៊ីលប្រភេទនេះមានសភាពធំជាង រហ័សនិងចំគោលដៅជាងប្រភេទគ្រាប់ដទៃជាហេតុធ្វើឱ្យរបកគំហើញនៃបច្ចេកវិទ្យា Hypersonic Missile នេះក្លាយជាបញ្ហាព្រួយបារម្ភចំពោះបញ្ហាសុវត្ថិភាពពិភពលោក ជាពិសេសគឺមហាអំណាចនុយក្លេអ៊ែ។

ព្រឹត្តិការណ៍ថ្មីៗនៃការបង្ហោះ Hypersonic Missiles

កាលពីខែសីហា ឆ្នាំ២០២១កន្លងទៅនេះ ប្រទេសចិនបានបង្ហោះសាកល្បងនូវ Hypersonic Missile របស់ខ្លួនដែលគ្រាប់រ៉ុកកែតនេះមានសមត្ថភាពអាចហោះកោងក្នុងគន្លងទាបនៅក្នុងបរិយាកាសបានជាហេតុធ្វើឱ្យមានភាពពិបាកយ៉ាងខ្លាំងក្នុងការទប់ទល់នឹងសព្វារុធអវកាសមួយនេះ។ បច្ចេកវិទ្យាដែលប្រទេសចិនបំពាក់នៅលើគ្រាប់នេះអាចឱ្យវាហោះព័ទ្ធជុំវិញគន្លងរបស់ផែនដីមុននឹងបាញ់សំដៅទៅកាន់គោលដៅ ហើយជាមួយនឹងការបាញ់សាកល្បងនេះ វាបាញ់ខុសគោលដៅតែប្រមាណ៤០គ.មប៉ុណ្ណោះ តែអ្វីដែលគួរឱ្យចាប់អារម្មណ៍ចំពោះ Hypersonic Missile មួយនេះគឺវាអាចផ្ទុកក្បាលគ្រាប់នុយក្លេអ៊ែរបាន ជាហេតុធ្វើឱ្យបណ្តាប្រទេសជាគូប្រកួតមានកង្វល់ជាខ្លាំងជាពិសេសគឺសហរដ្ឋអាមេរិកផ្ទាល់តែម្តងដោយសារគ្មានវិធីសាស្ត្រដែលមានប្រសិទ្ធភាពណាមួយក្នុងការរារាំងគ្រាប់ម៊ីស៊ីលប្រភេទថ្មីមួយនេះរបស់ចិន។ តែជាការឆ្លើយតបបកស្រាយទៅកាន់ពិភពលោក ចិនបានថ្លែងថាការបាញ់សាកល្បងមួយនេះធ្វើឡើងក្នុងគោលបំណងបន្តវិវឌ្ឍនភាពនៃវិស័យអវកាស បានន័យថាវាពិតជាមានសារៈសំខាន់ព្រោះវានឹងមានភាពងាយស្រួលហើយថោកក្នុងដំណើរទៅកាន់ទីអវកាសដែលអាចបម្រើផលប្រយោជន៍ដ៏សម្បើមសម្រាប់មនុស្សជាតិនាថ្ងៃខាងមុខ ហើយចិនខ្លួនឯងក៏នឹងមិនយកបច្ចេកវិទ្យាថ្មីនេះ យកមកលូកលាន់ក្នុងការប្រកួតប្រជែងនុយក្លេអ៊ែរជាមួយនរណាឡើយ។ ដោយឡែកប្រទេសរុស្សីបានបង្ហោះHypersonic Missile របស់ខ្លួនកាលពីឆ្នាំ២០១៩ ឈ្មោះថា Zircon ចេញពី Submarine ហើយគ្រាប់ទាំងនោះក៏អាចមានសមត្ថភាពប្រហាក់ប្រហែលនឹងគ្រាប់នុយក្លេអ៊ែរផងដែរ។ យ៉ាងណាមិញ លោកអគ្គមេបញ្ជាការកងទ័ពអាមេរិក Mark Milley បានប្រៀបធៀប ការសាកល្បង អាវុុធអ៊ីពែរសូនិករបស់ចិននេះ ទៅនឹងការសាកល្បងផ្កាយរណបសិប្បនិម្មិត Spoutnik របស់រុស្ស៊ី កាលពីខែតុលាឆ្នាំ១៩៥៧ ដែលនេះអាចជាសញ្ញាណនៃការប្រកួតប្រជែងវិស័យអវកាសដូចសម័យសង្គ្រាមត្រជាក់រវាងអាមេរិក និងសូវៀត។ ដោយឈរឱបដៃមើលមិនបាន សហរដ្ឋអាមេរិកបានសិក្សាស្រាវជ្រាវនៅក្នុងវិស័យនេះ ហើយបានតេស្តសាកល្បងបច្ចេកវិទ្យាHypersonic Missile របស់ខ្លួនបានជោគជ័យកាលពីថ្ងៃទី២០ ខែតុលា ឆ្នាំ២០២១ នេះឯង។ ជាមួយគ្នានេះដែរ ភ្នាក់ងារសន្តិសុខជាន់ខ្ពស់ Pentagon របស់សហរដ្ឋអាមេរិកបានសង្កត់ធ្ងន់ថា អាមេរិកនឹងផ្តល់អាទិភាពចម្បងចំពោះការស្រាវជ្រាវទៅលើបច្ចេកវិទ្យាថ្មីនេះ ហើយក៏សង្ឃឹមថាអាចបង្ហោះគ្រាប់របស់ខ្លួនបានដោយជោគជ័យនៅឆ្នាំ២០២៥ខាងមុខ៕