"ថង់ប្រាជ្ញារបស់កម្ពុជា ដឹកនាំដោយគ្រាប់ពូជរបស់កម្ពុជា"

Xenobot: មនុស្សយន្តមានជីវិតដំបូងបង្អស់

គំនូរច្នៃប្រឌិតដោយ៖ កញ្ញា គួច​ លាងផេង

យុគសម័យបច្ចេកវិទ្យានាពេលបច្ចុប្បន្នមានការបោះជំហានទៅមុខលឿនជាងអ្វីដែលយើងអាចគិតដល់ រាប់ចាប់តាំងពីគ្មានអ្វីទាន់មានអ្វីសោះ រហូតដល់មនុស្សអាចទាញយកទ្រឹស្តីដែលបានជាប់ដាននៅក្នុងសៀវភៅរបស់អ្នកស្រាវជ្រាវផ្សេងៗយកមកសំយោគជាមួយភាពវៃឆ្លាតរហូតបង្កើតបាននូវបច្ចេកវិទ្យាប្លែកៗមិនធ្លាប់មានជាបន្តបន្ទាប់។ មនុស្សយន្តដែលយើងធ្លាប់តែឃើញក្នុងភាពយន្តប្រឌិតបែបវិទ្យាសាស្ត្របានលេចវត្តមានមកក្នុងពិភពលោកយើងរួចមកហើយនៅក្នុងយុគសម័យ AI (បញ្ញាសិប្បនិម្មិត) ហើយមនុស្សយន្តទាំងនោះត្រូវបានគេរចនាឡើងក្រោមទម្រង់ផ្សេងៗគ្នា ខ្លះមានទំហំប៉ុនមនុស្ស ខ្លះតូច ខ្លះធំអាស្រ័យទៅតាមគោលបំណង មុខងារនិងប្រភេទរបស់ពួកវា តែគ្រប់ទម្រង់នៃមនុស្សយន្តដែលយើងធ្លាប់ឃើញ និងឮសុទ្ធសឹងតែត្រូវបានបង្កើតឡើងដោយគ្រឿងយន្តនិងគ្រប់គ្រងដោយកម្មវិធីកុំព្យូទ័រ ក៏ដូចជាបញ្ញាសិប្បនិម្មិត។

Xenobot ជាអ្វី?

Xenobot ជាឈ្មោះដែលទើបនឹងលេចឡើងនៅក្នុងពិភពនៃមនុស្សយន្តដែលបានបង្កភាពកក្រើកដល់អ្នកវិទ្យាសាស្ត្រខាងមនុស្សយន្ត និងAI។ វាខុសប្លែកពីមនុស្សយន្តធម្មតាទាំងស្រុងដោយហេតុថាមនុស្សយន្តធម្មតាមានទំហំធំៗ ទោះជាមិនធំខ្លាំងក៏មិនតូចខ្លាំងដល់ Xenobot ដែល មានទំហំរហូតដល់តូចជាង១មីលីម៉ែត្រឯណោះ។

តើ Xenobot កើតឡើងយ៉ាងដូចម្តេច?

វាត្រូវបានបង្កើតឡើងមកដោយគ្មានគោលបំណងណាមួយយ៉ាងពិតប្រាកដទេ ហើយអ្នកបង្កើតវាមកទៀតសោត កំពុងតែសិក្សានិងរិះរកពីគុណប្រយោជន៍និងគោលបំណងនៃការប្រើប្រាស់មនុស្សយន្តប្រភេទនេះ។ ខុសពីមនុស្សយន្តដទៃទាំងស្រុងដែលកើតចេញមកពីគ្រឿងលោហៈ ខ្សែភ្លើង បង្គុំគ្រឿងអេឡិចត្រូនិច និងគ្រឿងយន្តផ្សេងៗ មនុស្សយន្តដ៏ចម្លែកនេះ កើតចេញពីកោសិកាលូតលាស់របស់សត្វកង្កែបម្យ៉ាងមកពីអាហ្រ្វិកដែលមានឈ្មោះថា Xenopus Laevis​ ហើយហេតុផលនេះឯងជាប្រភពកំណើតនៃការដាក់ឈ្មោះថា Xenobot។ រឿងរ៉ាវជុំវិញ Robot ដ៏ចម្លែកមួយនេះគឺថា ការបង្កកំណើតរបស់វាមិនស្ថិតនៅក្នុងបញ្ជីដែលជីវវិទូធ្លាប់បានកត់ត្រានិងចំណាំទុកពីមុនឡើយព្រោះថាមិនមានភាវៈរស់ដូចជាសត្វ រុក្ខជាតិ ឬប្រភេទមីក្រូសារពាង្គកាយណាមួយដែលប្រើប្រាស់ការបង្កកំណើតបែបនេះឡើយ។​ យោងទៅតាមគេហទំព័រព័ត៌មាន​ CNN បានឱ្យដឹងថា​ Xenobot ប្រើប្រាស់នូវវិធីសាស្ត្រម្យ៉ាងហៅថា Kinetic Replication ដែលកោសិកាទាំងនោះចាប់ផ្តើមបង្ខាំងចូលគ្នារួចហើយផ្នែកខាងក្រៅនៃបណ្តុំកោសិកាទាំងនោះចាប់ផ្តើបដុះចេញនូវសរសៃឆ្មារៗម្យ៉ាងដែលអាចឱ្យពួកវាផ្លាស់ទីបាន ហើយអ្វីដែលពិសេសនោះគឺ ពួកវារួមគ្នាបង្កើតបាននូវកម្ទេចតូចៗនៅផ្តុំគ្នា ហើយប្រសិនបើកម្ទេចកម្ទីទាំងនោះត្រូវបានផ្តាច់ចេញពីកោសិកាមេនោះ ពួកវាអាចបន្តការប្រមូលផ្តុំចូលគ្នានិងធ្វើចលនាដូចទៅនឹងយន្តការដែលកោសិកាមុនៗធ្វើដូច្នេះដែរ។

Xenobot អាចធ្វើអ្វីបានខ្លះ?

តាមលក្ខណៈទូទៅ ជាមួយ Robot ប្រភេទនេះគេអាចគ្រប់គ្រងវាដោយសរសេរនូវ Algorithm ផ្សេងៗក្នុងការបញ្ជាពួកវាឱ្យធ្វើការងារផ្សេងៗដែលគេចង់ឱ្យវាធ្វើ។ ប៉ុន្តែ បើយោងទៅតាមសភាពដែលមានស្រាប់តាំងពីវត្តមានដំបូងរបស់វា Xenobot មានសមត្ថភាពក្នុងការដើរ ហែលក្នុងទឹកដោយសរសៃឆ្មារៗរបស់ពួកវា ផ្ទុកទម្ងន់ផ្សេងៗ ប្រមូលកាកសំណល់ដែលរាយប៉ាយឱ្យនៅផ្តុំគ្នា ហើយថែមទាំងអាចរស់នៅដោយគ្មានអាហាររយៈពេលជាច្រើនសប្តាហ៍ ព្រមទាំងអាចផ្សះនិងប៉ះប៉ូវនូវរាល់កន្លែងខូចខាតនៃតួខ្លួនពួកវាទៀតផង។ អ្វីដែលអង្រួនអ្នកវិទ្យាសាស្ត្រក្នុងពិភព Robot នោះគឺថ្មីៗនេះ វាត្រូវបានគេរកឃើញថាអាចចែកខ្លួន(បន្តពូជ) ដោយខ្លួនឯងបាន។​ ជាមួយនឹងសក្តានុពលទាំងនេះ អ្នកបង្កើតវារំពឹងថាថ្ងៃខាងមុខ របកគំហើញមួយនេះនឹងអាចបម្រើដល់ប្រយោជន៍មនុស្សជាតិយ៉ាងច្រើនផ្នែកដូចជាជួយដល់បរិស្ថានដោយដើរតួជាអ្នកប្រមូលនឹងបំបែកសារធាតុប្លាស្ទិចនៅក្នុងសមុទ្រ ពោលគឺសម្អាតទឹកនិងធានានូវគុណភាពទឹកដោយការកម្ទេចចូលនូវសំណល់ប្លាស្ទិច ក៏ដូចជារួមចំណែកក្នុងវិស័យវេជ្ជសាស្ត្រដោយធ្វើជាអ្នកចែកចាយសារធាតុឱសថឱ្យត្រូវទៅតាមកន្លែងនៃសារពាង្គកាយមនុស្ស ហើយគេក៏អាចប្រើវាក្នុងការភ្ញោចកោសិកាភាពស៊ាំក្នុងការព្យាបាលជម្ងឺផងដែរ។ ជាមួយគ្នានេះ គេក៏រំពឹងថានឹងព្យាយាមបន្ថែមនូវភាពឆ្លាតវៃដល់ Xenobot រហូតដល់ដំណាក់កាលដែលវាអាចប្រតិបត្តិការដោយគ្មានអន្តរាគមន៍ និងការបញ្ជាពីមនុស្ស។ ប៉ុន្តែទោះជាយ៉ាងណាក៏ដោយ នាពេលបច្ចុប្បន្ន មិនទាន់មានគោលដៅដ៏ច្បាស់លាស់ណាមួយក្នុងការប្រើប្រាស់ Robot មួយប្រភេទនេះនៅឡើយ ដោយគ្រប់យ៉ាងកំពុងស្ថិតនៅក្នុងការរុករកនិងរំពឹងទុកតែប៉ុណ្ណោះ។

អវសានកថា

ជាមួយនឹងទំហំដែលមិនអាចមើលឃើញដោយភ្នែកទទេ បូករួមនឹងសមត្ថភាពហួសពីការស្មានមួយចំនួនដូចដែលបានរៀបរាប់ពីខាងលើ Xenobot ក៏អាចក្លាយជាបញ្ហាព្រួយបារម្ភមួយផងដែរទន្ទឹមនឹងផលប្រយោជន៍ទាំងអម្បាលមាណដែលគេរំពឹងទុក។ យ៉ាងណាមិញ​ ក្នុងការធានាពីវិស្វកររបស់ Robot នេះ ពួកគេបានធានាថាមនុស្សយន្តទាំងនោះនឹងស្ថិតនៅក្រោមការឃ្លាំមើលយ៉ាងយកចិត្តទុកដាក់នៅក្នុងប្រអប់សុវត្ថិភាពក្នុងមន្ទីរពិសោធន៍ ហើយពួកវាអាចត្រូវបានគេបំផ្លាញតាមបែបជីវសាស្ត្របានយ៉ាងងាយ(Bio-degrade)។ លើសពីនេះ​ ក្នុងការគ្រប់គ្រងនិងប្រើប្រាស់ Xenobot នឹងត្រូវបានធ្វើឡើងដោយគិតគូរទៅដល់សុវត្ថិភាព និងប្រកបក្រមសីលធម៌វិជ្ជាជីវៈជាទីបំផុត៕

អ្នកអាចចូល subscribe Telegram ផ្លូវការរបស់ The SEED តាមរយៈ TheSEED
អត្ថបទដោយ៖ លោក គិត សុវណ្ណបូរី
spot_img
spot_img

អត្ថបទពេញនិយម

អត្ថបទទាក់ទង