កីឡាបាល់ទាត់គឺជាកីឡាមួយដែលពេញនិយមក្នុងពិភពលោកនាពេលបច្ចុប្បន្ន។ ក្នុងការប្រកួតបាល់ទាត់នីមួយៗក៏មានការផ្សាភ្ផាប់ជាមួយនឹងពាណិជ្ជកម្មនិងខ្លឹមសារន័យអប់រំជាច្រើនដូចជាបញ្ឍប់ការរើសអើងឬ ការគោរពសិទ្ធគ្នាទៅវិញទៅមកដោយសារតែកីឡានេះមានការគាំទ្រច្រើនដែលអាចធ្វើឱ្យមនុស្សជាច្រើនបានមើលឃើញអ្វីដែលការប្រកួតបានផ្សព្វផ្សាយ។ មួយរយៈពេលនេះ ក្នុងវិបត្តិសង្គ្រាមរុស្ស៊ីនិងអ៊ុយក្រែន ពិភពលោកហាក់បានក្រោកប្រឆាំងក្នុងការឈ្លានពាននេះ ដែលក្នុងនោះផងដែរយើងឃើញថាក្នុងវិស័យបាល់ទាត់ក៏មានការផ្សព្វផ្សាយប្រឆាំងនឹងសង្គ្រាមមួនេះផងដែរ ដែលមានដូចជាការប្រកួតក្របខ័ណ្ឌលីគកំពូលអង់គ្លេស(Primer league)។ ក្នុងនោះ ក្រុមខ្លះបានពាក់អាវគាំទ្រអ៊ុយក្រែនជាកម្លាំងចិត្តនិងបានលុបចោលកិច្ចសន្យាចាក់ផ្សាយរបស់ការប្រកួតក្នុងប្រទេសរុស្ស៊ីបន្ទាប់ពីការលុកលុយ ហើយក៏នឹងបរិច្ចាគ ១ លានផោនដល់មូលនិធិសង្គ្រោះរបស់គណៈកម្មាធិការសង្គ្រោះគ្រោះមហន្តរាយ។ រីឯក្លឹបចំនួន២០របស់លីកបានយល់ព្រមជាឯកច្ឆ័ន្ទក្នុងការផ្អាកកិច្ចព្រមព្រៀងជាមួយដៃគូផ្សាយជាមួយរុស្ស៊ីដោយមានប្រសិទ្ធិភាពភ្លាមៗ។ ចំណែកឯការប្រកួតរបស់ក្លឹបនៃប្រទេសរុស្សី និងជម្រើសជាតិរុស្សីក៏ត្រូវបានគេដកសិទ្ធិប្រកួតក្នុងក្របខ័ណ្ខអន្តរជាតិផងដែរ។ តើសង្គ្រាមរុស្សីនិងអ៊ុយក្រែនបានធ្វើឱ្យវិស័យបាល់ទាត់ប្រែប្រួលដូចម្តេចខ្លះ?
១.ការចាប់ផ្តើមនៃទណ្ឌកម្មលើក្លឹបបាល់ទាត់ដែលពាក់ព័ន្ធនឹងរុស្ស៊ី
ចាប់ពីថ្ងៃ២៤ ខែកុម្ភៈ ឆ្នាំ២០២២ ដែលជាថ្ងៃដែលរុស្សីបានធ្វើការវាយប្រហារទៅលើអ៊ុយក្រែនមក វាបានធ្វើឱ្យពិភពលោកមានការភ្ញាក់ផ្អើលយ៉ាងខ្លាំង។ គ្រប់មជ្ឈដា្ឋនបានចាប់ផ្តើមថ្កោសទោសនូវការឈ្លានពានមួយនេះមិនថាមជ្ឈដ្ឋាននយោបាយ សេដ្ឋកិច្ច និងជាពិសេសមជ្ឈដ្ឋានកីឡាក៏មានការថ្កោសទោសនិងដាក់ទណ្ឌកម្មមកលើរុស្ស៊ីផងដែរ។ មួយវិញទៀត អ្វីដែលគួរចាប់អារម្មណ៍ក្នុងវិស័យកីឡានោះគឺវិស័យបាល់ទាត់ដែលបានថ្កោសទោសយ៉ាងខ្លាំងនិងបានដាក់ទណ្ឌកម្មជាច្រើនទៅក្រុមបាល់ទាត់ជម្រើសជាតិរុស្ស៊ី និងក្រុមបាល់ទាត់ក្លឹបអាជីពនៅរុស្ស៊ីពីសហព័ន្ធបាល់ទាត់ពិភពលោក(FIFA) និងសហព័ន្ធបាល់ទាត់អឺរ៉ុប(UEFA) ។ បើយើងនិយាយអំពីទណ្ឌកម្មដំបូងមកក្លឹបអាជីពមួយនៅរុស្ស៊ីគឺ ស្ប៉ាតា ម៉ូស្គូ(spartakmoscow)ត្រូវបានដកចេញពីការប្រកួតក្របខណ្ឌទី២របស់អឺរ៉ុបនិងបានឱ្យក្រុមមួយទៀតឡើងដោយស័្វយប្រវត្តិ។ ម្យ៉ាងទៀត ក្រុមហ៊ុនរុស្ស៊ីដែលបានឧបត្ថម្ភលើក្លឹបបាល់ទាត់នៅអឺរ៉ុបត្រូវបានក្លឹបបញ្ចប់កុងត្រាមុនការកំណត់ដោយសារតែមិនគាំទ្រនិងការឈ្លានពានរបស់រុស្សីនេះ។ អ្វីដែលគួរឱ្យចាប់អារម្មណ៍ខ្លាំងជាងគេក្នុងវិស័យបាល់ទាត់នោះគឺក្លឹបបាល់ទាត់មួយដ៏ល្បីល្បាញនៅអង់គ្លេសគឺក្លឹបឆែលស៊ី (Chelsea) ដែលមានម្ចាស់ក្លឹបជាជនជាតិរុស្ស៊ីនិងជាមនុស្សម្នាក់ដែលស្និទ្ធនឹងលោកពូទីនផងដែរនោះ គឺលោក រូមែន អាប្រាហាមូវិច ត្រូវបានរាជរដ្ឋាភិបាលអង់គ្លេសដាក់ទណ្ឌកម្មជាខ្លាំងទាំងរូបលោកនិងក្លឹបបាល់ទាត់ឆែលស៊ី។ ក្នុងនោះដែរ សម្រាប់រូបលោកផ្ទាល់ក៏ត្រូវបានរាជរដ្ឋាភិបាលអង់គ្លេសបង្កកទ្រព្យសម្បត្តិនៅក្នុងប្រទេសអង់គ្លេសថែមទៀតផង។ មុននេះបន្តិច លោកក៏បានព្យាយាមលក់ភាគហ៊ុនអចលនទ្រព្យនៅទីក្រុងឡុងដ៍តម្លៃ ២០០ លានផោនក្នុងរយៈពេលប៉ុន្មានថ្ងៃដើម្បីចៀសវាងការបង្កកទ្រព្យសម្បត្តិរបស់គាត់ក្នុងករណីដែលគាត់ត្រូវបានដាក់ទណ្ឌកម្មដោយចក្រភពអង់គ្លេស តែចុងក្រោយក៏នៅតែរាជរដ្ឋាភិបាលអង់គ្លេសដាក់ទណ្ឌកម្មដដែល។ បើនិយាយពីក្លឹបបាល់ទាត់ឆែលស៊ីនេះវិញ ក៏ត្រូវបានរាជរដ្ឋាភិបាលប្រទេសអង់គ្លេសដាក់ទណ្ឌកម្មដោយហាមឃាត់មិនឱ្យលក់សំបុត្រសម្រាប់ការប្រកួត ដោយមានតែអ្នកកាន់សំបុត្ររដូវកាលប៉ុណ្ណោះដែលអាចចូលរួមការប្រកួតបានរហូតដល់ចប់រដូវកាល។ លើសពីនេះទៅទៀត ក្លឹបនេះក៏មិនអាចផ្តល់កិច្ចសន្យាថ្មីដល់កីឡាករ ឬចូលរួមក្នុងសកម្មភាពផ្ទេរ ក៏ដូចជាមិនអាចលក់ទំនិញដូចជាខោអាវក្លិបនិងវត្ថុអនុស្សាវរីយ៍របស់ក្លិបបានទៀតទេ ហើយក្រុមហ៊ុនមួយចំនួនបានបញ្ចប់កិច្ចសន្យាមុនកាលកំណត់ជាមួយក្លិបមួយនេះផងដែរ។
២. ការដកក្រុមជម្រើសជាតិរុស្សីចេញពីការជម្រុះបាល់ទាត់ពិភពលោក
ព្រឹត្តិការណ៍បាល់ទាត់ពិភពលោកជាការប្រកួតមួយដែលមានការចាប់អារម្មណ៍ខ្លាំងទូទាំងសកលលោកដោយសារជាព្រឹត្តិការណ៍មួយដែលប្រព្រឹត្តិក្នុងរយៈពេល ៤ ឆ្នាំម្តង។ ដូចជាធម្មតា ក្រុមជម្រើសជាតិកីឡាករបាល់ទាត់រុស្ស៊ីក៏អាចមានឱកាសចូលរួមព្រឹត្តិការណ៍នេះផងដែរក្នុងឆ្នាំ២០២២ក្នុងប្រទេសកាតា(Qatar)។ ក៏ប៉ុន្តែដោយមានការឈ្លានពានរបស់រុស្ស៊ីទៅលើអ៊ុយក្រែន បានធ្វើឱ្យមជ្ឈដ្ឋានបាល់ទាត់មានការភ្ញាក់ផ្អើលហើយទាំងសហព័ន្ធបាល់ទាត់ទី្វបអឺរ៉ុបនិងសហព័ន្ធបាល់ពិភពលោកបានសម្រេចចេញសេចក្តីថ្លែងការណ៍រួមមួយក្នុងការដកក្រុមជម្រើសជាតិរុស្ស៊ីចេញពីការជម្រុះបាល់ទាត់ពិភពលោកឆ្នាំ២០២២កាលពីចុងខែកុម្ភៈ ដើម្បីឆ្លើយតបទៅនឹងការឈ្លានពានរបស់រុស្ស៊ីលើអ៊ុយក្រែន។ សេចក្តីថ្លែងការនោះបានប្រកាសថា ក្រុមជម្រើសជាតិរុស្ស៊ី និងក្លឹបរុស្ស៊ីទាំងអស់នឹងត្រូវហាមឃាត់មិនឱ្យចូលរួមការប្រកួតអន្តរជាតិរហូតដល់មានការជូនដំណឹងបន្ថែម។ បន្ទាប់ពីការដកនេះផងដែរ លោក វ្លាឌីមៀល ពូទីន ក៏បានប្រតិកម្មផងដែរថាមិនគួរយករឿងនយោបាយមកពាក់ព័ន្ធជាមួយនឹងកីឡា ហើយសហព័ន្ធបាល់ទាត់រុស្ស៊ីក៏បានដាក់ពាក្យបណ្តឹងទៅតុលាការកីឡាផងដែរ តែចុងក្រោយក៏បានដកពាក្យបណ្ដឹងប្រឆាំងនឹងការសម្រេចចិត្តរបស់សហព័ន្ធបាល់ទាត់ពិភពលោកក្នុងការបណ្តេញក្រុមជម្រើសជាតិបុរសរបស់ខ្លួនចេញពីការប្រកួតបាល់ទាត់ពិភពលោកឆ្នាំ ២០២២ វិញ។ ដូច្នេះ ក្រុមបាល់ទាត់ជម្រើសជាតិ គ្មានឱកាសលើឆាកប្រកួតអន្តរជាតិឡើយ ជាពិសេសបាល់ទាត់ពិភពលោកឆ្នាំ២០២២ និងទាំងក្រុមជម្រើសជាតិនិងក្លឹបបាល់ទាត់រុស្ស៊ីនឹងមិនបានចូលរួមព្រឹត្តិការណ៍អន្តរជាតិរហូតដល់មានការវវិត្តវិញនៃការសម្រេចចិត្តឡើងវិញរបស់សហព័ន្ធបាល់ទាត់ពិភពលោក។
សរុបមកសង្គ្រាមរវាងរុស្ស៊ីនិងអ៊ុយក្រែនមិនត្រឹមតែធ្វើឱ្យមានប្រតិកម្មលើវិស័យនយោបាយនិងសេដ្ឋកិច្ចនោះទេ ប៉ុន្តែវិស័យកីឡាក៏មានការដាក់ទណ្ឌកម្មមិនឱ្យអត្តពលិកចូលប្រកួតពានរង្វាន់អន្តរជាតិ ដែលយើងចាប់អារម្មណ៍ខ្លាំងជាងគេនោះគឺវិស័យបាល់ទាត់ដែលជាកីឡាដ៏មានប្រជាប្រិយភាពជាងគេ។ សង្គ្រាមរុស្ស៊ីនិងអ៊ុយក្រែនបានធ្វើឱ្យពិភពបាល់ទាត់មិនពេញចិត្តនៅការឈ្លានពាន ហើយបានធ្វើឱ្យក្រុមជម្រើសជាតិរុស្ស៊ីមិនបានចូលរួមប្រកួតដណ្ដើមពានរង្វាន់អន្តរជាតិ និងក្រុមហ៊ុនរុស្ស៊ីដែលឧបត្តម្ថលើក្លឹបបាល់ទាត់ផ្សេងត្រូវបានលុបកិច្ចសន្យា។ ហើយមួយទៀត ក្លឹបដែលមានម្ចាស់ជាជនជាតិរុស្ស៊ីក៏ត្រូវបានហាមឃាត់មិនឱ្យលក់សម្ភារៈនិងសំបុត្រដែលនេះធ្វើឱ្យក្លឹបនោះអាចជួបវិបត្តិហិរញ្ញវត្ថុផងដែរ។ នេះហើយដែលជាឥទ្ធិពលសង្គ្រាមរវាងរុស្ស៊ីនិងអ៊ុយក្រែនដែលជះលើវិស័យបាល់ទាត់ ដែលធ្វើឱ្យរុស្ស៊ីទទួលទណ្ឌកម្មច្រើនមិនថានយោបាយ សេដ្ឋកិច្ចនិងកីឡា។
